Jam 3 | WSK | STEP | Aga singsang alo, nina suen la Kaem den ko kausa kariimet ko aratalko me ko kaeralko. Saki la kausa kariimet ko bagomonko. Mu awuk, ana kausa kariimet mu Kaem ninguru nanga tuterukko.

James 3

Nangamili ko sinar tanakko den

1 Aga singsang alo, nina suen la Kaem den ko kausa kariimet ko aratalko me ko kaeralko. Saki la kausa kariimet ko bagomonko. Mu awuk, ana kausa kariimet mu Kaem ninguru nanga tuterukko. 2 Ana suen la munan duap duap te supusan ale dagulasan. Bare kari bo kuring te den bo me ta balu maguwuso, mu kari umutang kari diram nunguningkiri. Ale nu kota ko ikia, ko bagara ko sinar tauk ale diram la bagurukko mu terong mam.

3 Ana horse te nanga ikia karo tumonko mu ana ain bilik gotektek nogore sumulak te betesan, ale aguwaya namanakko nangamang aniso mu te nunga tagi gurugusan, se te punga geragasan ale nangarak namasan.

4 Agi dal te ko ikia talko. Dal mu mel aromemek. Se aking daula sokel ago ituguso mu ninguru naguwoso. Bare ko diruwura kari mu ko gomang dal apalagaya te namurukko aniso, mu nu ko wosagam gotek mu la guruguso se kuwim mu te la namoso. 5 Uwutatala, nangamili mu nangimik guang lilim ko nuamur gotek bo, bare nangamili mu den munak balukko mu sokel ago.

Tama kuamili ko ikialko. Tama kuamili katirta nunguningkiri, bare te tama gigip biya am barasuk ale giarum ningi tam mel am kani sapurukko. 6 Se nangamili mu tama iwitatala. Mu nangimik nuamur saki kiaram, ale nu kilek memek bitirukko ninguru terong mam. Tama kotam Satan kota tama mu uwiso, se biyala barasoso ale nanga ikia, nanga nangamang, nanga bagara aolak maguwu saposo. Se nangamili mu memek te ana ninguru nanga beteso. ^{▼▼James 3:6,8,10 Nangamili ko den: Pro 16:27; Mat 12:36; 15:11,18; Rom 3:13; Eph 4:29.}

7 Kariimet nuna giarum ko mel, yalek inanganang, se gagi ko mel mu suen la nunga lila awumonko mu terong maman, ale butata betesan. 8 Bare kari bo ta nu kota ko kuamili bituokko me terong. Nangamili mu katir noman me ta saposo. Nu pempem la mot memek iwita kariimet sang nunga moruk se kuemonko iwita bagoso.

9 Anananga nangamili te nanga Kari Biya Kaem ko nup patowasan. Ale aking kariimet nu ko turan te nunga beteram mu den memek te nunga maguwunakko balsan. 10 Nagiring suwanta te den duap ilagala aratoso: ana Kari Biya ko nup patowasan, ale aking den memek saki te balsan. Aga sikisaki alo, munan uwuta mu me terong. 11 Agi yu ningo se yu seselak mu yu mutim suwanta te aratomon i? Mena. 12 Aga singsang, tam fig mu ko nunguning olive bitiruk i? Se aking mayang waen mu ko nunguning fig bitiruk i? Mena. Koma suwanta tala, yu bo seselak mu te ni yu yawara bo utuko me terong mam.

Ikia nunguning mu Kaem kote taiso

13 Ni awiriya ikia ningo karogo agi mu, ni bagara lila yawara mu te baga se, kilek yawara yawara la bita se lagerko. Umutang te asele kariimet karkomon ale ikimon ikia nikate mu ikia nunguning ma balmonko. 14 Bare ni keta la nip biya toko negesam ale ni bo ko gemang magoso mu, ni kaweler ale nimi ikia karogo ma me baluko. 15 Ikia nikate aniso mu duruk wonong te me taiso. Mu ali ewere ko ikia, Satan kote taiso, ale aking nangata nanga nangamang te aratoso. 16 Mu awuk, kariimet nongota nunup biya anirukko negesan ale nunumi ko nongomang magoso, nina nunga ningi munan imi karogo aniruk se arigalko: nuna nongomang suwanta me bagomonko, ale kilek memek duap duap betemon se arigalko.

17 Bare ikia duruk wonong te taiso mu am nikinang nunguningkiri. Se kariimet ikia umutang nongote aniso, mu nuna lila te bagara nongomang suwanta ko kuesan. Ale nuna nongota nunumi ko la me negesan, mena, nuna saki alo ago la nunga sangarmonko kuesan, ale nuna nunumi ira kutuwu saki alo nobowa ningi bagasan. Ale nuna betela saki alo nongomang nungara ko kariimet nunguningkiri, kilek ningo la ninguru tala betesan. Nuna kariimet suen la munan koma suwanta arungak betesan, ale nuna munan kawel bo me betesan. Kariimet munan diram lila te la saki alo nunga lila awusan, mu nononga ura ko nunguning mu kariimet ningi munan ningo diram la aratoso.

18